鋪緊磚喇！

最近我簡直係愛上了苯Ｂ媽媽個BLOG，還用了2日時間刨完小屋仔，大project和村姑生活記趣內的所有Post，（接著我會追埋其他主題的，還打算試下佢Ｄ食譜添，其實昨天巳經試了個蔥油餅）係咪好癲呢？！睇完之後，搞到我都鬼咁想搵返塊地起村屋（發夢中）過下村姑癮，呵呵。不過我好肯定男主角這個香港島原屋民是不會妥協的，所以我都係發下夢算吧啦。
不過話時話，在羡慕人家既同時，我倆好似把我地間小屋遺忘了。自從決定搵朋友亞Joe做Designer之後，我倆就懶到一個星期都無一次上去小屋度巡視！想當年為第一間小屋裝修時我地都不知跟得幾足，幾乎每晚都上去hea下！
雖然男主角成日話唔直接搵裝修傅而寧願比貴少少搵設計師，都係因為唔想浪費太多時間去監工。但我又唔係咁睇，自己唔跟緊Ｄ就少咗一份參與感，咩都用錢解決，即使好完美咁完成咗件事，但都硬係會少咗一分感情和經歷！唔知大家明唔明我講咩？
諗諗咁樣唔係幾好！於是昨晚我就坐言起行，襯住練完歌返屋企時，順道上小屋打個白鴿轉。哎吔，原來唔覺唔覺巳經鋪緊磚喇！無把光脫脫（即拆哂所有野既時候）的小屋拍下一張肉照添，失策！
而家個廳巳經鋪完磚，我覺得隻淺灰色地磚好靚呀，可惜個師傅鋪得唔夠細心，而家個玄關位Ｄ磚同個廳Ｄ磚紋都唔夾既，激死，果然真係睇少眼都唔得！不過算啦，唔鋪都鋪咗咯，唔通要人地起哂佢再鋪過咩！唯有日後跟緊Ｄ啦。
好啦都係時候報告一下進度喇：

﹣ 設計師提意用同系黑色磚鋪玄關位，效果不錯呢，不過粗心大意的師傅無對紋呀！你見唔見到呀？

﹣ 雖則係咁，但手工都算不錯啦，你睇下個三角位做得幾好。

﹣ 淺灰色磚鋪出來既效果都好ok喎，在這個晚上十點多的時候睇都不覺得暗。

書房就仲未開始鋪，其實我倆應該在鋪磚前把所有喉位拍低做個record，唔知呀Joe有無替我們拍低呢？

睡房的地磚就鋪了３份１，餘下的唔知幾時會鋪好呢？

這是小鬼們的企缸位，將會用啡啡黃黃由天然石造成的馬賽克鋪切，唔知效果和想像的有無分別呢？聽亞Joe講個厠個水嚨頭滴水，男主角突然醒起上手業主L先生都提過我們，說是因為水壓問題，話每次大廈洗水箱都會咁，打個電叫管理處同佢講返，佢地會做D手腳就會無事。但其實我聽完都唔係好明，睇怕都要研究一下如何根治這問題先得喇。

Tweet