買樓定賣樓？

金融海嘯過後樓市升到癲咗，我自己層樓都升唔少，計落都升咗4x%，2年幾就升4x%又真係好癲。有朋友好緊張提議我快快襯樓市咁癲就放咗層樓，因為咁癲既機會唔係時時有。但我自己就有自己的睇法，供樓既支出，我巳經預咗，我而家响自置物業裡住，只要我一直有能力咁供，那麼我就可以住到幾時都得，而且仲總有供完既一日，就好似自己租自己樓咁租到某個年期就可以唔使比租咁，就咁睇我睇唔到有咩原因要我放咗佢，除非我賣咗層樓收返既錢夠我自己租類近質素既樓住上2x-30年，咁我或者都會考慮放。有朋友覺得我貪心，亦有担心我萬一加息我仲頂唔頂得住。

其實樓除咗有投資功能，它還有實際的需要，在於我，樓既實際需要大過投資功能，所以只要個物業既價值係跟住大市升跟大市跌，咁我就覺得買得過。在香港衣、食、住、行，以“住”的開支最大，又可能因為老媽自小就向我灌輸咗磚頭是最保值的睇法，所以買樓從來都係我第一個目標，一出來社會做事，我就巳經為買我第一層樓的目標進發。際遇令我避過了97樓價高峄，令我遇上8萬5及首置的機會，在過去的十年，我終於可以有一所自覺不錯的安居之地。加上物業的升值令自己的財富不致被通脹所蠶食，所以我覺得買樓係一個不錯的長期投資。

最近有d朋友問我而家買樓係唔係好危險，會唔會摸頂？其實我都唔知幾時係頂，如果我知，我應該發咗唔使做啦。但我覺得住係必需品，只要計過數自己供得輕鬆，就幾時入市都唔係問題囉。因為我並不喜歡被迫遷的感覺，而且有自己的物業感覺會較有歸屬感。

註：圖片來源

Tweet