初乳

由得知小金魚的存在那一刻，順產和餵人奶是我堅定不移的選擇。因此，我都特別留意相關的知識。資料、講者、有經驗人仕都告訴我，嬰兒頭幾天食得不多，加上有儲備，所以即使未上奶也不怕，而且未完全上奶之前，有些叫初乳的淡黃色分泌，是很濃縮精華，絕對足夠初生的小人兒。

小金魚出生那天，我擠不出我期待的初乳，其實很担心，沒有傳說中的精華給小金魚，會否令原本輕磅的她更細小？！

但本著要早早讓身體知道有造奶的需要，所以我也不斷埋身密密餵，小金魚也努力啜。新手的人奶媽和新手的人奶B，各自都好努力，但始終都未合作過，效果和想像的有距離。

正當好不安時，小金魚第一次的胎糞排出，好鼓舞呀！姑娘話這是最好的證明，小金魚有「奶」落肚。

餵人奶的第一步，似乎成功了，不過老實講，餵人奶比我感覺好似信天主咁，信就得架喇！但其實個心都唔係咁踏實！哈哈哈！

Tweet

小金魚出生記--晴朗的一天

瑪麗醫院的產房和我想像的不一樣，房間光潔亮麗，牆身淡緑色，棕色家俱，再配上緑色的床、緑色紫色醫護人員裝束，感覺似小型旅館的房間，多於一間產房。

房內有窗，向貝沙灣方向，它在很高的牆上，窗外是藍天白雲，產床就在窗傍，我的角度剛好是望著那個藍白色的天空。

當天幸好男主角一直都和我在一起，還有藍天白雲的天空。男主角就站在窗前，所以在我角度望過去，所有畫面都係亮麗的，沒有半點緊張。當時的他給我很冷靜的感覺，並常常用好肯定的語氣告訴我，一切都係如期中咁順利地等小金魚出生。

但後來才知，原來他當時也很担心，他

盤算著如果順產過程有咩差池，他應該如何應對，即刻開刀？還是怎樣？

對呀！氣氛是沒有半點緊張，但回想當時的情況，小金魚是有點危險的呀！當時助產仕告訴我們小金魚位置不太好，最理想的位置是面向下，但小金魚卻是扭歪面。再加上臍帶纏頸兩圈！咁有咩理由會是不緊張，不担心呢？！

不過感謝天父，最後這條小金魚也有驚無險地來到我們的小家庭中。2.54kg的她，是小一點，但只要健康就好了！感謝主。

Tweet

8月26日，小金魚出生記

25號零晨見紅，加上唔知係唔係既陣痛，決定入院，3點開始痛多咗密咗，但頂得順，我仲沾沾自喜我承受力高。一直痛到翌日中午，無咩點瞓，頂唔住，睡著了幾小時，痛的幅度和頻度也少了，以為要回家之際，就係晚上飯後9點開始變化，這次的痛不講得笑，瞓著了痛一下就即時醒晒！一小時痛3次已經無覺好瞓，但好彩我連緊餘的十多分鐘也可熟睡，一直到26號零晨3點，開始大件事，每4至8分鐘大痛一次，痛到傻！開始後悔做咩選擇順產！但我仍然可以在那三、兩分鐘瞓著！如是者捱到朝早9點多，醫生check度數，3度，入得產房，我以為終於可以生，醫生問我做唔做無痛分娩，我當時痛到傻咗，心諗都未到十級痛已經咁激，到十級痛時應該會死得，諗都唔諗一口答應，係勁痛之下，用緊餘既力氣，打咗個電話比在家stand by既男主角，我比男主角先到產房，姑娘開始比無痛分娩既資料我睇，痛到咁仲叫我睇咩鬼啫，心諗你比咩我都簽架啦！當時姑娘提醒我可以聞笑氣，我有氣無力咁聞極都聞唔到，直到男主角到了產房，見到他，我心定好多，係佢既拍子下，終於順利聞到，聞到後我反應全完正常，同埋真係止到痛。轉頭無耐，麻醉科醫生到，她講了一大輪風險，最後話可能最痛時都未必有效！我心諗唔係下嘩！我就怕我頂唔到10級痛先決定頂一頂支麻醉針啫。於是到她再confirm我是否做無痛的一刻，我決定拒絕！係女人嘛，五時花六時變是常識吧！^^

在產房我仲要忍痛、忍住唔比小金魚出，因為要等開到10度先得！一心以為好快生得既我，最後要由9點半等到12點先可以生，當中不斷担心開唔夠度數，要食全餐就大件事！好彩姑娘又打氣、男主角又打氣，係我都唔知邊句真邊句假既情況下，我終於達標，可以生！

約11點45開始生，我出盡全身力氣，和姑娘配合，約半小時，終於生咗出來！出來時，小金魚有點危險，因為佢臍帶繞了頸兩圈，姑娘好快咁告訴我要先剪臍帶，轉頭再生埋個肩膀！終於生咗喇！舒服晒！

Tweet

8月25日，零晨，見紅

這幾天還在想好似無咩動靜，怎料係預產期前一天的零晨就見紅，量如第一天M，於是同男主角兩個人一起去醫院，辦妥簡單的入院手續，姑娘幚小金魚監測心跳，大約半小時後醫生檢查過，小金魚一切正常，見紅可能是輕微宮縮的正常反應，應該未必咁快出世，但為安全起見，我要留院，男主角可以先回家。

Tweet

產假第一天

我想盡量把假期放在小金魚出世之後，所以睇自己身體情況，盡可能把產假推到最後才放。隨著小金魚體重增加，我行動開始緩慢，坐坐下起身行會感到小金魚的重量令我有點痛，所以我決定我的產假由8月23日開始，即預產期前3.......日。^^

有朋友話我都攞得好盡下，嘻嘻嘻...其實如果我唔係開始行得辛苦我想返工返到生添呀！^^

產假的第一天，碰巧鐘點姨姨有事今天不能來打掃，那我就唯有充當鐘點，不過頂著大肚子打掃的確有點辛苦，平時個多小時的工夫，我搞了整個下午，中途還抖了好幾次！好彩我有的是時間，慢慢搞也可以，哈哈哈！

Tweet

繼續發夢

前晚又夢見小金魚出世，這次一樣唔痛，但現實世界應該無咩可能，我只希望不要痛得太長時間，已經好好！

昨晚我又發夢，這次夢見我要幚小金魚沖涼，但無從入手，哈哈哈！

似乎越近預產期，無形壓力越多！不過我相信船到橋頭，無咩好担心！現在只希望小金魚不要太遲出來同大家見面！還有最重要的是要健健康康！

Tweet

39週喇！

39週喇！39週喇！真的足晒月了！早兩日連日文四年班末期考都考完了，終於可以真真正正安心等待小金魚的出現。不過這兩天都無咩動靜，我又開始担心小金魚會遲，不要遲呀！最好就準時啦！期待和您見面呀！小金魚！^^

Tweet

iBond4

上個月尾政府推出新一輪的通脹掛勾債券，iBond4 (4222)，前3次我都無買，適逄review緊自己和小金魚既投資安排，於是人抽我又抽，申請咗4手，最後只派得2手，最後決定入小金魚基金，用作收息，OK啦。不過我都係第一次買債券，真係咩都唔識，只係知每年派兩次息，最低息保證係1厘，咁即係好過放銀行啦。但係如果我中途加碼，係唔係打後既派息我都會有得收？如果我由頭揸到尾，咁到期日係唔係以當時既價格回返比我呢？這些我都唔曉喎！

年期：3年

到期日：2017年8月11日

Tweet

38週

繼續倒數，今天剛滿38週，上星期五，再去私家照一照小金魚，這次夠秤了！5磅半！對上一次照，私家話我介口介得太清，因為跟據私家既紀錄，我輕了磅，但小金魚郤重了一點。於是上星期有幾天食多少少、放縱少少，結果小金魚只是個肚腩仔未達標。其實有妊娠糖尿、而呀B又偏細既準媽媽如我，都真係被考起，要係控制和放縱間游走！還有兩星期就到預產期！要努力呀！
不過話時話，我早兩日開始，感覺到小金魚個頭係低咗，坐坐下要起身行已經無之前咁敏捷，要慢慢，企定咗，仲要抖一抖先可以行，因為真係感覺到有點痛，有時仲會突然好急！可能個頭仔又低咗！我有個感覺、可能係希望：小金魚會係預產期前會出世。希望小金魚係滿39週後、滿40週左右出世就好喇！我自己最想係8月25-28日這幾天。唔知會唔會呢？^^

Tweet

是日立秋

一直都以為8月尾預產期的小金魚是盛夏BB，但原來今天已經是立秋，立秋是秋天的開始，有「一場秋雨一場寒」的講法，都好，四季中我最喜愛的是秋天，因為不熱不冷，不濕不乾，氣溫濕度都恰到好處。

Tweet

脆瓜蛋黃肉

我有幾個欣賞的廚師，Jacky Yu是其中之一，因為他的出品很有特色。今次我試整他的台式脆瓜蛋黃肉，但因為我不太喜歡用雞粉，所以我自己改了少少。

材料：

$20 半肥瘦豬肉（或豬腩肉）搞碎（約300克）

80 克脆瓜切粒

2隻 鹹蛋黃

調味：

2湯匙脆瓜汁、1湯匙蠔油、1湯匙麻油、1/4茶匙海鹽、3/4茶匙生粉、1/2茶匙老抽、胡椒粉適量

做法：

1. 豬肉加入脆瓜粒和調味料搞至起膠，醃30分鐘；

2. 用一隻大啲既鍋碟，先放鋪上耐熱保鮮紙，放入2隻蛋黃，再倒入豬肉約7成滿，水滾後隔水大火蒸50分鐘；

3. 預備另一隻碟底可放上烚好的菜，把蒸好的肉餅反轉倒入另一個兜，完成。

Jacky Yu新食譜，強烈推介

Tweet

37週，足月了

從上年年尾12月22日驗到有小金魚，到而家差不多8個月，過咗好多個關：照心跳、唐氏篩選、抽羊水驗DNA、照結構、初期耐糖測試、例行耐糖測試、食糖尿餐、篤手指驗血糖、BB過細，細過2週‧‧‧‧‧‧，一直到今天，終於滿了37週，跟據香港醫生既標準37週至41週就已經足月了！不過，原來跟據美國婦產科醫師學會的研究，39週至40週6才是足月，相關報導)。不過，我而家人在香港就跟返香港既標準啦！因為已經足月，心理上既壓力又少一點！但當然最理想係小金魚按時出生，不要太早，也不要太遲40週左右就最好啦！=)

上星期五去私家照，我既體重相比4星期前不升反跌，跌咗少少的1磅，而小金魚頭圍、肚圍又跌出2週的正常範圍，醫生話可能我控制血糖既同時食得太清，同埋瞓得唔夠！嗯，咁的確我早幾個星期，成日迆住係沙發睇電視都唔願瞓，咁我唯有又再瞓瞓瞓食食食啦！其實係控制血糖既同時又要食得夠、瞓得夠的確係好難！但我會加油既！

小金魚，還有約3星期，我們就可以見面了，好期待呀！

Tweet

米粉班戟

早排係數字屋買咗「米粉」，這米粉是用米磨成粉，而不是魚蛋米的米粉。存貨一輪已忘記了為何要買，但又想消滅佢，所以用來試做班戟。我記得我在韓國、日本食過QQ的班戟，好想自己整到，在網上找來不同的米粉班戟食譜研究，這次米粉班戟就有少少QQ的感覺，不過仍然都係未夠，第日再研究。

不過作為一個另類班戟，仍然不錯！

材料：

米粉100g

奶150ml

蛋1隻

糖15g

油8g

Baking powder 5g

鹽 少許

做法：

1. 把所有材料撈混

2. 倒入搽了油的煎pan，用易潔的最易控制

3. 細火慢慢煎，金黃後再煎另一面

4. 記得不要心急，否則好易燶

5. 煎好後可放喜歡的食品在面，這次我放了芒果、忌廉、朱古力豆。其實朱古力醬、香蕉，忌廉也是不錯的選擇。我也試過放雞蛋、芝士、午餐肉，也不俗！=P

這就是用米磨成的米粉

Tweet

發夢

踏入8月，昨晚發夢，夢見小金魚出咗世，醒來後我把夢境告訴男主角，他即時問我係仔定女，其實我在夢中沒有留意到。於是回想一下蛛絲馬跡：

在夢中，最好笑的是我明明在私家做例行產檢中，產檢完我問醫生問題，問咩我唔記得咗，但醫生九唔搭八咁同我講話我已經生咗，我反應唔到，唔多信，我同醫生講，我一啲都唔痛喎！

轉個鏡頭就見到粉藍色包被包著的小金魚，白白的皮膚、又大又圓又黑、個頭又大、眼睫毛亦好長，好安靜咁睡覺中，現在回想似女仔樣，就咁同男主角離開診所，去到一個泊滿游艇的碼頭，之後就被男主角叫醒咗。

哈哈哈，這個夢有無啲咩啓示呢？有人話夢境與現實多是相反，小金魚唔通係黑忟忟、眼細細、頭細細、眼睫毛短短的呢？還有不足4星期就到預產期，好期待呀！^^

Tweet