艾美的天空: 2010東京遊記──Day3

東京遊第三天，重點行程係去築地漁市場食壽司，其實旅館係包早餐的，但巡視睇過早餐現場之後決定無謂浪費quota，所以一大清早我只係飲咗支奶就向築地漁市場出發。印像中第一次去築地漁市場是和男主角一起去！當時的我是第一次用staff ticket飛日本，仲要係座Y-class，好開心！

偷影的壽司@壽司大和

大約9:30我們到了築地漁市場，之前食過3次都係去"壽司大"，今次決定試下隔幾間鋪位的"壽司大和"，"大和"比"大"更多人排隊，一心諗住都試下啦，點知我覺得都係"大"好好多，因為先是"大和"個企堂呀姐唔比我地同d壽司影相，個壽司師父仲好似好趕咁拿拿淋咁出哂d壽司比我地﹝"大"係你食完一件先一件架！﹞，好似想等我地快d食完空個位出來比下一批客，感覺no service可言！然而最敗筆的是那舊壽司飯，正宗的日本壽司內的壽司飯既比例係大約是整體的1/3or less，一口一件，食落唔會成口飯、剛剛好！但這兒的飯既比例竟然多到好似佔咗整體的一半，成口飯，感覺很膩！好彩佢地既魚生都有一定既水準，不過下次我都係去返"大"！

其實壽司大都唔少人等架！

食完壽司，就在築地行行逛迋和shopping，在築地除了壽司還見到吉野家總店，其實我好想試下日本的吉野家，因為據聞日本的吉野家牛肉飯比香港的好食好多，但我巳經覺得香港吉野家都唔錯架喎！咁日本既未好味到唔得掂？！雖然次次都想試，但次次都係食唔落，唯有等到我地既緣份到先食啦！

在築地有很多好靚的食材，今次我買咗d昆布同粉紅晶鹽，其實我仲見到好多木魚碎、乾瑤柱，可惜我剛剛買了一大袋在家，所以唯有下次再買。

之後男主角拎住個iphone個指南針四圍走，原來佢帶我去汐留食拉麵，旅遊書話這間拉麵攞過獎！於是又去食，由築地行去汐留用咗差不多大半個鐘，但d壽司都未落隔，唯有在汐留四處走走，無意中發現有個宮崎駿既大鐘，可惜錯過了匯演時間睇唔到，我估可能係有d公仔轉來轉去，發下聲咁呱。

其實汐留有個日本電視台，佢地個商場好細，而且無咩嘢好行，比較得意既係佢地有間shop，專賣那電視台的劇集或節目的相關產品，但我有好多劇集都唔識，只認得宮崎駿一些卡通片同埋麵包超人。這兒有間麵包超人專門店，見到佢地既"真身"好好笑，真係食得架！

麵包超人

麵包超人既"真身"

行到無嘢可以再行時，決定去試拉麵，就係下面這間。但我覺得唔好食，太太太太太咸了，食完個麵要飲成公升水先掂呀！

男主角的燒芝士拉麵

我的幼拉麵

拉麵店對面仲有d明星手印，我個個都唔知係邊個，只係認得一個藤原紀香，我度過佢隻手同我隻手差唔多大咋喎！佢仲打埋咀印呀！

食完晏，下個節目是去原宿的竹下通行街街，當天是閑日﹝4月1日﹞，但估唔到人多到我仲以為日本既愚人節係法定公眾假期！人太多，多到連鋪頭都幾乎入唔到，所以無咩點shopping，於是又係四圍行行逛逛就算。

逛完原宿，下一站是涉谷，而重點是Tokyu hand，我很喜歡行Tokyu hand，因為我覺得他們的生活精品很有心思，經常都在這兒有有趣的新發現！今次我買了一個可以slow down拖肥食飯速度的金屬球、一些髮飾用品，由於一個post唔可以load太多相，唯有下次另開新topic重點介紹是次東京遊的戰利品。

又到晚飯時間，是日晚餐，在"牛角"涉谷第二店食烤肉，味道和質素可以啦。不過價錢有點貴！